म्याग्दी । म्याग्दीको रघुगङ्गा गाउँपालिकामा निर्माणाधीन राहुघाट जलविद्युत् आयोजनाको बाँध क्षेत्रमा सोमबार पहिरोमा पुरिएर दुई जनाको मृत्यु भएको छ भने पाँच जना घाइते भएका छन् ।
रघुगङ्गा गाउँपालिका–४ दग्नामको फेदीमा निर्माणाधीन विद्युत आयोजनाको बाँधमा पहिरो खसेको हो । पहिरोमा पुरिएर बागलुङको तमानखोला गाउँपालिका–१ का २२ वर्षिय सुजन बुढामगर र चितवनका अन्दाजी ४५-४६ वर्षका लालबहादुर सुनारको घटनास्थलको मृत्यु भएको प्रहरीले जनाएको छ ।
पहिरोमा पुरिएर घाइते भएका भारतको गोपालगङ्गाका ५५ वर्षिय धरम कुसहवा, भारत विहार शासाराम जिल्लाका ५५ वर्षिय भैयाराम चौधरी र बाराको निजगड नगरपालिका–७ का ४० वर्षिय कुमार थापामगरलाई उपचारका लागि पोखराको मणिपाल शिक्षण अस्पतामा भर्ना गरिएको छ ।
सर्लाहीको बागमती नगरपालिका–५ का ३२ वर्षिय गणेशबहादुर मगर र रोल्पाको सुनछहारी गाउँपालिका–३ का ३३ वर्षिय चुमान पुनको बेनी अस्पतालमा उपचार भइरहेको छ । बाँधमा काम गरिरहेको अवस्थामा एक्कासि भिरबाट पहिरो खसेको प्रत्यक्षदर्शीले बताएका छन् ।
नेपाल विद्युत् प्राधिकरणको सहायक कम्पनी रघुगङ्गा हाइड्रोपावर प्रवद्र्धक रहेको ४० मेगावाट क्षमताको आयोजनाको सिभिल ठेकेदार भारतीय जयप्रकाश एसोसियट्सका मजदुरहरू पहिरोमा पुरिएका हुन् ।
