काठमाडौं । गत वैशाखदेखि यही भदौ १४ गतेसम्म देशभर कुल ३ हजार २८१ वटा विपद्का घटना घटेका छन् । ती घटनामा परेर दुई सय सात जनाको निधन भएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार विपदमा परेर २२ जना बेपत्ता भए भने ७ सय ७४ जना घाइते भएका छन् । त्यसबाट पाँच हजार ९६३ परिवार प्रभावित भएका छन् ।
प्राधिकरणका अनुसार सो अवधिमा घटेका विपद्का घटनामा सबैभन्दा धेरै आगलागी भएको छ । कुल १ हजार १९७ आगलागीका घटना भएका छन् । आगलागीमा परेर १५ जनाको निधन हुँदा एक सय ६५ जना घाइते भएका छन् ।
बाढीका २ सय ४३ घटना हुँदा २७ जनाको ज्यान गएको छ भने २२ जना बेपत्ता र १० घाइते छन् । बाढीमा परेर १ हजार ७७८ परिवार प्रभावित भएका छन् । सो अवधिमा तीन सय ६८ ठाउँमा पहिरो गएको छ । पहिरोमा परेर १८ जनाको निधन भएको छ भने २८ जना घाइते भएका छन् । पहिरोका कारण चार सय ८१ परिवार प्रभावित भएका छन् ।
यस्तै, दुई सय ६६ वटा भारी वर्षाका विवरण प्राधिकरणले उपलब्ध गराएको छ । भारी वर्षाका कारण ६ जनाको ज्यान जाँदा १२ जना घाइते र ७ सय ११ परिवार प्रभावित भएका छन् । कुल २ सय ५८ चट्याङका घटना हुँदा ३१ जनाको ज्यान गएको छ । त्यसमा परेर १ सय ९३ जना घाइते भएका छन् भने ३ सय १७ घरपरिवार प्रभावित भएका छन् ।
यसैगरी सर्पदंशका २ सय ६८ घटना हुँदा ७२ जनाको ज्यान गएको छ । २ सय २ जना घाइते भएका छन् । कुल १ सय ५८ वटा वन डढेलोको घटना हुँदा २ जना घाइते र २७ परिवार प्रभावित भएका छन् । हुरीबतासका दुई सय ८० घटना हुँदा आठ जनाको निधन भएको छ भने ४१ जना घाइते भएका छन् । त्यसबाट ५ सय ३६ घरपरिवार प्रभावित भएका छन् ।
प्राधिकरणका अनुसार जनावर आक्रमणको घटनामा १५ जनाको निधन भएको छ । लेक लाग्नुका ४९, भूकम्प ५, डुङ्गा पल्टेर २, असिना र माहामारीका एक–एक घटना घटेका छन् ।
