काठमाडौँ । बिहीबारदेखि पटक–पटक बन्द तथा सुचारु हुँदै आएको मुग्लिन–नारायणगढ सडक खण्ड फेरि अवरुद्ध भएको छ ।
हिजो बेलुकीदेखि दुईतर्फी खुलेको सडक राति दुई बजेदेखि फेरि बन्द भएको हो । प्रहरीका अनुसार गाडी ओहोरदोहोर भइरहेको बेला तुइनखोला नजिकै पहिलेकै ठाउँमा फेरि पहिरो खसेर सडक अवरुद्ध भएको हो ।
पहिरोसँगै खसेको ढुंगाले लागेर एउटा ट्रक सडक छेउमा फसेको छ । ट्रक चालक सामान्य घाइते भएका र उनको मुग्लिनमा उपचार भइरहेको पनि प्रहरीले जनाएको छ ।
पहिरोसँगै सडक छेउमा कोल्टे परेर अडिएको ट्रक हटाएपछि मात्रै गाडी सञ्चालन हुन सक्ने बताइएको छ । पहिरो पन्छाउने डोजर तैनाथ अवस्थामा रहे पनि ट्रक हटाउने क्रेन पुग्न बाँकी रहेकाले सडक खुल्न समय लाग्ने प्रहरीले जनाएको छ ।
दैनिक औसतमा १० हजार गाडी आउजाउ गर्ने यो सडक खण्डमा गएको बिहीबारदेखि पटक–पटक पहिरो खसेर सडक अवरुद्ध हुँदा यात्रुले सास्ती बेहोरेका छन् । सडकमाथिको पहाड पूरै खस्ने जोखिम रहेकाले सो स्थानमा यात्रा गर्नु जोखिमपूर्ण बनेको छ ।
