गुडिरहेको बसमा करेन्ट लाग्दा सल्यानमा दुई जनाको मृत्यु

बुटवल। दाङको तुलसीपुरबाट रोल्पाको दलसिंगेका लागि छुटेको यात्रुबाहक बसमा करेन्ट लाग्दा दुई जनाको घटनास्थलमै मृत्यु भएको छ। तुलसीपुरबाट छुटेको रा १ ख ८३४ नम्बरको बस बिहीबार सल्यानको राप्ती राजमार्गको चोर खोला नजिकै जाँदा करेन्ट लागेको हो।

घटनामा रोल्पाको दलसिंगेका कालुराम डाँगी र टोपीलाल डाँगीको मृत्यु भएको सल्यानका सीडिओ वेदप्रसाद खरेलले जानकारी दिए। उनीहरु जना बाबु र छोरा हुन्। बसमा २० देखि २५ जना सवार भएको जनाइएको छ। यद्यपि यसबारे एकीन जानकारी आउन बाँकी छ।

बुधबार राति हावाहुरी र पानी आउँदा सडक छेउको बिजुलीको तारमा रुख ढलेको थियो । सडकमुनिबाट बस पार हुँदा बसमा करेन्ट प्रवाह भएको प्रत्यक्षदर्शीले जनाएका छन्।

घटनाकै कारण यातायात अवरुद्ध भएको छ। प्रहरीले बाटो खुलाउने काम गरिररहेको छ।