काठमाडौँ। नेपाल प्रहरीले श्रृखलाबद्ध रुपमा सुनको सिक्री लुटपाट गर्ने पाँच जनालाई पक्राउ गरेर सार्वजनिक गरेको छ। काठमाडौँ उपत्यका अपराध अनुसन्धान कार्यालयले आइतबार पत्रकार सम्मेलन गर्दै उनीहरुलाई पक्राउ गरेको हो।
सो गिरोहले मोटरसाइकलको प्रयोग गरेर बिहानको समयमा मर्निङ वाकमा हिँडिरहेका महिलाले लगाएको सुनको सिक्री लुटपाट गर्ने गरेका थिए।
पक्राउ पर्नेमा रामेछाप घर भई हाँडीगाउँ बस्ने रविन दमाई, धरान घर भइ चावाहिल बस्ने रवि विश्वकर्मा, काभ्रे घर भइ बानेश्वर बस्ने उमेश क्षेत्री, धनकुटा घर भइ राममन्दिर बस्ने राहुल माझी र भारत घर भइ न्युरोड बस्ने श्रकान्ता माइतीलाई पक्राउ गरिएको उपत्यका अपराध अनुसन्धान कार्यालयका प्रमुख एसएसपी मनोज केसीले जानकारी दिए।
असार १ गते कपुरधारा, ग्रान्डी चोक, असार ३ गते नागार्जुन बुद्ध चोक, असार १३ गते टोखा विष्णुमती, असार १९ गते टोखा कृष्ण मन्दिर र काठमाडौँ बंगलामुखी मन्दिर, असार २० गते टोखा र चागलमा उनीहरूले सुनको सिक्री लुटपाट गरेको खुलेको र सीसीटीभी लगायतका माध्यमबाट अनुसन्धान पछि उनीहरूलाई पक्राउ गरिएको केसीले बताए।
