निर्माण व्यवसायीद्वारा अर्थमन्त्रीको राजीनामा माग

काठमाडौँ। नेपाल निर्माण व्यवसायीले निर्माणकार्यको म्याद थप गर्न माग गर्दै धर्ना दिएका छन्। शुक्रबार काठमाडौँको माइतीघरमा भेला भई निर्माण व्यवसायीले अर्थमन्त्री डा. प्रकाशशरण महतको राजीनामा माग गर्दै धर्ना दिएका हुन्।

निर्माण व्यवसायीले गरेको कामको भुक्तानी अर्थमन्त्रीले नदिने भनेको भन्दै उनीहरूले अर्थमन्त्रीले तत्काल राजीनामा दिनुपर्ने बताए। निर्माण व्यवसायीले गरेका कामको भुक्तानी नपाएपछि बाध्य भएर आन्दोलन गर्नुपरेको नेपाल निर्माण व्यवसायी महासंघका अध्यक्ष रवि सिंहको भनाइ छ।

सरकारले भुक्तानी नदिँदा बैंकले निर्माण व्यवसायीलाई कालोसूचीमा राखेको, मजदुरलाई पारिश्रमिक दिन नसकेकोलगायत समस्या झेल्नुपरिरहेको भन्दै उनले सरकारले भुक्तानी गर्न नसके तत्काल यस्ता आयोजना खारेज गर्नुपर्ने उल्लेख गरे।