झलनाथको विश्लेषणः पार्टी कांग्रेस र माओवादीको पिछलग्गु बनेर निरिह भयो

काठमाडौँ। नेकपा एकीकृत समाजवादीका सम्मानित नेता झलनाथ खनालले पार्टी नेपाली कांग्रेस र नेकपा माओवादीको पिछलग्गु बनेको भन्दै चर्को असन्तुष्टि व्यक्त गरेका छन्।

एकीकृत समाजवादीको जारी स्थायी कमिटी बैठकमा १६ पृष्ठको दस्तावेज प्रस्तुत गर्दै उनले एमालेबाट विद्रोह गरेको शक्ति अहिले आफूहरूसँग नभएको र कांग्रेस–माओवादीको पछाडि लाग्दा पार्टी निरीह बनेको विश्लेषण गरेका हुन्। चुनाव गठबन्धन गरेर कमजोरी भएको उनको निष्कर्ष छ।

‘दक्षिणपन्थीहरुको पिछुवा बन्ने र उनीहरु माथि भरोशा गर्ने गलत कार्यनीतिको पार्टी शिकार हुन पुग्यो। त्यसले गर्दा हाम्रो पार्टीको जनमत झन खुम्चिन पुग्यो।’ लिखित प्रस्तावमा खनालले भनेका छन, आखिर हाम्रो पार्टी दक्षिणपंथी र माओवादीको पिछलग्गु जस्तो भएर अघि बढ्यो। नेपाली कांग्रेस र माओवादी दुवैले हाम्रो पार्टीलाई देशैभरि धोखा दिए। हाम्रो पार्टीलाई मतदाता मात्र बनाए । त्यसले हाम्रो पार्टीको बन्दै गरेको क्रान्तिकारी छवी र साख नराम्ररी गिराई दियो। कार्यकर्ताहरुदेशव्यापी रुपमा निरास भए। त्यसपछि “बरु एमाले तिरै जाने” भन्ने चिंतनको विकास हुन थाल्यो र पलायन बढदै गयो।’