अष्ट्रेलियामा.... यी पैसा

• प्रकाश ढोडारी
• आइतबार, १ भदौ, २०७६
• 3 years ago
• साहित्य

व्यस्त सिड्नीको पानी परेपछिको बिहानी, काममा जाने समय, सडक छेउको पार्क अनि छेउछाउमा पानी नै पानी छ । अझै पनि सिमसिम पानी परिरहेकै छ । बेलाबेलामा वाइपर चलाउनु परेको छ आज । मेरा लागि ड्राइभिङ आज अलि असहज भएको छ । दायाँबायाँ हेर्दै सुस्त रफ्तारमा अघि बढिरहेको छु म । “यी पैसा.....यी गाडी....यी घर....यी अस्ट्रेलिया.....यी सुन्तली ...,” अगाडिको भिडबाट नेपाली आवाज, एकनासको विरह र क्रन्दनको । मैले गाडी छेउ लगाएँ । 

 

“यी पैसा.....यी गाडी....यी घर....यी अस्ट्रेलिया.....यी सुन्तली ...” भन्दै चिच्याउँदै, एउटा हातले आफैँलाई लोपर्दै अर्को हातले जमिनको पानी शरीरमा छ्याप्तै गरिरहेको एक निवस्त्र पुरुषमाथि सबैका आँखा अडिएका थिए । एउटा गोरीको आवाज पनि सुनियो, “ओ म्याड म्यान ।” 

 

भिडलाई छिचोल्दै म त्यो पुरुषको छेउमा पुगेँ “आम्मै बिर्खमान जी !” मैले अचम्मले जिब्रो टोक्न पुगेछु । बिचरा नेपाल जाने कि अस्ट्रेलियामा बस्ने भन्ने दुविधामा थियो ऊ अघिल्लो महिनासम्म । एक महिनाअघि एउटी नेपाली बहिनीको आत्महत्याले निकै दुःखी बनाएको थियो उसलाई । हेर यो हरि विजोग ! उसले मलाई अघिल्लो हप्ता मात्रै उसकी सुन्तलीले अर्कैसँग बिहे गरेको कुरा सुनाएको थियो ।

 

गएको आइतबार उसले एउटा पवमा निकै रमाइलो गरेको थियो रे ! अर्को दिन त्यही पवमा उसले हजारौं डलर लुटायो रे ! त्यसमाथि उसको पोकरको लतले हजारौं डलर उडायो । हजारौं डलर हारेका कारण उसको मानसिक अवस्था अलि कमजोर छ भन्ने त सुनेको हो मैले पनि । यसरी बेहोसी नै भैसकेको थाहा थिए । विचरा...!

 

आफ्नो गाडीमा भएको ब्ल्याङ्केट च्यापेर म पनि विर्खमानको पछाडि कुदेँ । ब्ल्यांकेटले उसलाई छोपेर गाडीमा राखेर उसको अपार्टमेन्टमा पु¥याएँ । त्यहाँ पनि ऊ एक सुरमा “यी पैसा.....यी गाडी....यी घर....यी अस्ट्रेलिया.....यी सुन्तली ...” भनिरहेको थियो । 

 

“ल लुगा लगाउनुस् बिर्खमानजी । के गरेको यो ?”

 

ऊ चिच्यायो, “यी पैसा.....यी गाडी....यी घर....यी अस्ट्रेलिया...यी सुन्तली...।”

 

“बिर्खमानजी, यसो नगर्नुस् । केही भएको छैन । पबमा नजानु थियो जानुभयो, अब के गर्ने ? भैगो अब त्यसमा पिर मानेर के नै हुन्छ र ? अब त्यो पैसा त कमाइन्छ नि फेरि पनि । अब सुन्तलीकै कुरा गर्दा ५–६ वर्ष त कुराउनुभयो । र, पनि उसलाई प्रष्ट जवाफ दिनुभएन, अस्ट्रेलियामा बस्ने कि नेपाल जाने निर्कौल गर्न सक्नु भएन । अब उसले पनि कति कुरोस तपाईंलाई ? आमा–बाबु छोरो कहिले आउँछ भनेर कुरेर बसेका छन् । हेर्नुस् त तपाईंको अवस्था उहाँमाथि पनि तपाईंले बेइमानी गर्नुभयो । तपाईं, हामीजस्तो भर्खर अस्ट्रेलिया आएको मान्छे पनि त होइन । हामीलाई बाटो देखाउनुपर्ने हाम्रो अगुवा हेर्नुस् त तपाईको हालत ! उपचार नै गराउनुपर्ने अवस्थामा...।”

 

मेरो कुरालाई कुनै वास्ता नै नगरी ऊ भने फेरि पनि एकोहोरो चिच्याइरहेको थियो, “यी पैसा...यी गाडी....यी घर....यी अस्ट्रेलिया.....यी सुन्तली ... ।”

 

• Money

ग्लोबल नेपालीपत्रमा प्रकाशित कुनै समाचारमा तपाईंको गुनासो भए हामीलाई info@nepalipatra.com मा इमेल गर्न सक्नुहुनेछ । साथै तपाई आफ्नो बिजनेश प्रवद्र्धन गर्न चाहनुहुन्छ भनेsales@nepalipatra.com सम्पर्क गर्न सक्नुहुनेछ । हामीसँग तपाईंफेसबुक रट्विटरमा पनि जोडिन सक्नुहुन्छ ।