काठमाडौं । नेकपा एमालेका सचेतक एवं प्रतिनिधिसभा सदस्य महेश बर्तौलाले संयुक्त राष्ट्रसङ्घको मुख्यालय न्युयोर्कमा बसेको उच्चस्तरीय राजनीतिक मञ्चअन्तर्गतको संसदीय बैठकमा सम्बोधन गरेका छन् ।
साउन १० गतेदेखि जारी बैठकमा सांसद बर्तौलाले नेपालको तर्फबाट दिगो विकास लक्ष्य नम्बर ६ (स्वच्छ खानेपानी तथा सरसफाइ)का लागि संसदीय कारबाहीबारे संक्षिप्त धारणा राखेका हुन् ।
‘नेपालको तर्फबाट ‘दिगो विकास लक्ष्य नम्बर ६ (स्वच्छ पानी र सरसफाइ) को लागि संसदीय कार्य कार्यक्रममा हामी सांसदहरुलाई २ मिनेट समय दिइएको थियो । कार्यक्रममा ८२ भन्दा बढी देशका सांसदहरुको उपस्थिति रहेको थियो । नेपालको प्रतिनिधित्व गर्ने हामी तीन जना सांसदले विभिन्न विषयमा आफ्नो धारणा राख्ने अवसर पायौं ।’ बर्तौलाले सामाजिक सञ्जालमार्फत जानकारी गराएका छन् ।
८२ भन्दा बढी देशका सांसदहरूको उपस्थिति रहेको कार्यक्रममा नेपालको प्रतिनिधित्व गर्ने सांसद बर्तौला, माओवादीका सांसद माधव सापकोटाले पनि आफ्नो धारणा राखेका थिए ।
राष्ट्रिय योजना आयोगका उपाध्यक्ष डा. मीनबहादुर श्रेष्ठको नेतृत्वमा नेपाली प्रतिनिधिमण्डल गत साता न्यूयोर्क प्रस्थान गरेको थियो ।
टोलीमा कांग्रेसका तर्फबाट राष्ट्रियसभाको राष्ट्रियसभाको दिगो विकास तथा सुशासन समिति सभापति अध्यक्ष प्रकाश पन्थ, एमाले सचेतक बर्तौला, माओवादी केन्द्रका सांसद सापकोटा, राष्ट्रिय योजना आयोगका सचिव तोयनारायण ज्ञवालीलगायत छन् ।
