काठमाडौँ। राष्ट्रिय स्वतन्त्र पार्टी (रास्वपा)का सभापति रवि लामिछानेले आफूलाई ‘इरिटेट’ गरेको भन्दै असन्तुष्टि पोखेका छन्। नागरिकता र राहदानीको कुरालाई लिएर आफूलाई इरिटेट गरेको भन्दै सामाजिक संजालमार्फत असन्तुष्टि पोखेका हुन्।
चितवन– २ मा भएको उपनिर्वाचनमा पनि विजयी भएका लामिछानेको सांसद पदको योग्यतामाथि प्रश्न उठाउँदै पुनः बुधबार युवराज सफलले सर्वोच्चमा अर्को रिट दायर हालेपछि आफूलाई चिढ्याउने काम भएको गरेको पोस्टमार्फत जानकारी दिएका हुन्।
‘मुद्दा हाल्नु र मुद्दा हाल्ने उद्योग चलाउनु दुई अलग कुरा हुन्। मान्छेलाई इरिटेट गर्ने पनि सीमा हुन्छ,’ रविले फेसबुकमा लेखेका छन्।
अमेरिका नागरिकता परित्याग गरेको तथ्य अदालतको माघ १३ को फैसलाले नै पुष्टि गरिसकेको साथै आफूले नेपाली नागरिकता पुनः कायम गराएको प्रष्ट्याएका छन्।
आफूले अदालतले झिकाउनु भनेको अमेरिकी राहदानीको सक्कल निस्सा जेठ ९ गते सर्वोच्चमा बुझाइसकेको कुरा टेलिभिजनबाट घोक्रो सुक्ने गरी सप्रमाण बोलेको भन्दै उनले लेखेका छन्, ‘घण्टीलाई बजाउनमात्र होइन घण्टीले बजाउन पनि मिल्छ।’
