बालकृष्ण खाँणलाई राज्यले फसाएको होः कांग्रेस सहमहामन्त्री यादव

काठमाडौँ। नेपाली कांग्रेसका सहमहामन्त्री महेन्द्र यादवले पार्टीका नेता बालकृष्ण खाँणलाई राज्यले फसाएको बताएका छन्। आइतबारको केन्द्रीय समिति बैठकमा बोल्दै उनले यस्तो बताएका हुन्।

खाँणमाथि राज्यले ठूलो अन्याय गरेको उनको भनाई छ। यसबारेमा उनले भने, ‘हाम्रो आदरणीय नेता, नेपाली कांग्रेसका जुझारु नेता बालकृष्ण खाँणलाई राज्यले फसाएको छ, उहाँमाथि राज्यले ठूलो अन्याय गरेको छ। अहिलेसम्मको अनुसन्धानबाट न कुनै जाहेरी छ, न उहाँलाई कसैले पोलेको छ, न कुनै प्रमाण भेटिएको छ।’

सहमहामन्त्री यादवले खाँणमाथि अभियोगमात्र लागेको तर प्रमाणित नभएकाले कसुरदारजस्तो व्यवहार गर्न नहुने बताए। खाँणले पार्टीका नेता कार्यकर्ताको धेरै संरक्षण गरेको भन्दै यादवले उनलाई दुख पर्दा सहयोग गर्नुपर्ने बताए।