काठमाडौँ। नेकपा एमालेको संसदीय दलको बैठक सुरु भएको छ। नयाँ बानेश्वरस्थित संसद भवनको ल्होत्से हलमा अहिले बैठक बसिरहेको छ।
बैठकबाट एमालेले सुन तस्करीका विषयमा सरकारको जवाफ र गृहमन्त्रीको राजीनामा माग्ने तयारी गरिरहेको छ। एमालेले सरकारका मन्त्रीहरूको संरक्षणमा लामो समयदेखि सुन तस्करी भएको भन्दै उपप्रधान तथा गृहमन्त्रीको राजीनामा माग्ने तयारी गरेको हो।
दलको बैठकले थप रणनीति तय गर्ने बताइएको छ। गत बुधबार त्रिभुवन विमानस्थलबाट बरामद गरिएको १०० केजी सुन प्रकरणमा सरकारले प्रतिपक्षी दलहरुलाई आक्षेप लगाएको भन्दै एमाले रुष्ट छ।
यही प्रकरणमा एमालेले सरकारसँग धारणा माग्ने भएको छ। कम्बोडिया भ्रमणबाट फर्किने क्रममा सोमबार राति एमाले अध्यक्ष केपी शर्मा ओलीले गृहमन्त्री नारायणकाजी श्रेष्ठको चर्को आलोचना गरेका थिए।
उनले गृहमन्त्रीको गैरजिम्मेवारीपनले हद नाघेको भन्दै आक्रोश पोखेका थिए। सुन प्रकरणमा केही सञ्चारमाध्यमहरुले व्यवसायी दीपक मल्होत्रा र एमाले अध्यक्ष ओलीलाई जोड्दै आएका छन्।
