गृहमन्त्री श्रेष्ठको नैतिकतामाथि गम्भीर प्रश्न खडा भएको छः सांसद दाहाल

काठमाडौँ। राष्ट्रियसभा सदस्य देवेन्द्र दाहालले सुन तस्करी प्रकरणमा गृहमन्त्री नारायणकाजी श्रेष्ठको नैतिकतामाथि गम्भीर प्रश्न खडा भएको बताएका छन्। बिहीबारको राष्ट्रियसभा बैठकमा बोल्दै सांसद दाहालले यस्तो बताएका हुन्।

नेकपा एमाले राष्ट्रियसभा संसदीय दलका नेता समेत रहेका दाहालले सुन तस्करीमा उच्च तहको नेतृत्व संलग्नता रहेको दावी गर्दै उच्चस्तरीय छानबिन समिति गठनको माग गरे।

सुन प्रकरणको अनुसन्धानलाई छिटो अगाडि बढाउनुको साटो कुनै जवाफदेहिता लिनु नपर्ने गरी गृहमन्त्री श्रेष्ठ निकै चूर्तिफूर्तिका साथ विमानस्थल गएको भन्दै आपत्ती जनाए।

‘हात्ती सरहको १०० केजी सुन हवाई मार्गबाट भित्रिदा थाहा नपाउने सरकार खास गृहमन्त्रीमाथि गम्भीर प्रश्न उठेको छ। सिंगो विमानस्थलको सुरक्षा र भन्सारको सुरक्षा अवस्था कस्तो छ? यसको जवाफ कसले दिने हो। गृहमन्त्रीले होइन र अर्थमन्त्रीले होइन र सिंगो यो सरकारले दिने होइन र?’ बैठकमा बोल्दै उनले भने।