राजनीतिलाई दूषित गर्न हुँदैनः केपी ओली

काठमाडौँ। नेकपा एमालेका अध्यक्ष केपी शर्मा ओलीले राजनीतिलाई दूषित गर्न नहुने बताएका छन्। सोमबार ललितपुरको च्यासलस्थित पार्टी कार्यालयमा आयोजित युग दूत विमोचन तथा स्रष्टा भेटघाट कार्यक्रममा अध्यक्ष ओलीले यस्तो बताएका हुन्।

उनले सबै नीतिहरूको मुहान राजनीति भएकाले यसलाई दूषित गर्न नहुने धारणा राखे। राजनीतिमा लागेका केही व्यक्ति खराब हुन सक्ने भए पनि समग्र राजनीतिलाई नै खराब भन्न नमिल्ने उनले जिकिर गरे।

ओलीले सुन्दर र आधुनिक भविष्य निर्माण गर्न द्रुत गतिले अघि बढ्नुपर्ने र समाजको विकास गर्नुपर्ने जिकिर गरे। उनले अब मुलुकमा ३३ प्रतिशत महिला सहभागिताको लडाई सकिएको र त्यसभन्दा बढी बढ्नुपर्ने उल्लेख गरे।

उनले अन्य धेरै विकासित देशहरूमा ३३ प्रतिशत सहभागिता पुर्याउन अझै बाँकी रहेको बताए।