भागबण्डा नमिल्दा रोकियो कोशीका मुख्यमन्त्रीको शपथ

काठमाडौँ। भागबण्डा मिलाउन नसकेपछि कोशी प्रदेशका मुख्यमन्त्री उद्धव थापाको शपथ ग्रहण स्थगित भएको छ। साढे १० बजेका लागि तय भएको मुख्यमन्त्रीको शपथग्रहण कार्यक्रम बेलुकी पाँच बजेका लागि सारिएको छ।

आज गठबन्धन दलबाट एक(एक जनालाई मन्त्री बनाउने तयारी थियो। तर गठबन्धनमा मन्त्रालय भागबण्डा र कांग्रेस र माओवादीभित्र कसलाई पठाउने भन्ने विषयमा कुरा नमिल्दा शपथ रोकिन पुगेको छ।

सत्तारुढ गठबन्धनभित्र नेकपा माओवादी केन्द्रले आर्थिक मामिला तथा योजना मन्त्रालय पाउने सहमति छ। एकीकृत समाजवादी पार्टीले भने भौतिक पूर्वाधार मन्त्रालयमा दाबी गरेको छ। मुख्यमन्त्री थापा समाजवादीलाई भौतिक पूर्वाधार मन्त्रालय दिन तयार छैनन्। कांग्रेसभित्र पनि कसलाई सरकारमा लैजाने भन्ने विवाद छ। जसका कारण उनले शपथग्रहणको समय सारेका हुन्।