काठमाडौँ। नेपाली कांग्रेसका नेता डा. शेखर कोइरालाले नयाँ–नयाँ काण्डहरु आउने बेला हुने गरेका शीर्ष नेताबीचको भेटबारे प्रश्न उठाएका छन्।
बिहीबार काठमाडौँमा बिहीबार नेपाल प्रेस युनियनले आयोजना गरेको कार्यक्रममा बोल्दै नेता कोइरालाले देशमा एकपछि अर्को काण्ड भइरहँदा त्यसमा माथिल्लै तहको संलग्नता हुने गरेको दाबी गर्दै यस्ता घटनाहरु बाहिर आउने बित्तिकै दलका शीर्ष नेताहरु बैठक बसि हाल्नुको अर्थ के हो भनेर पनि सोधेका छन्। उनले तीन बीच के विषयमा छलफल हुन्छ भन्ने नै थाहा नभएको समेत बताए।
शरणार्थी प्रकरण र पछिल्लो सुन तस्करी प्रकरणको अनुसन्धान भैरहेका बेला प्रधानमन्त्री पुष्पकमल दाहाल, एमाले अध्यक्ष केपी शर्मा ओलीले र आफ्नै पार्टीका सभापति शेरबहादुर देउवाबीच भएको भेटलाई कोईरालाले शंकास्पद ठानेका हुन्।
पछिल्लो समयको क्विन्टल सुन तस्करी प्रकणतर्फ संकेत गर्दै नेता कोइरालाले भ्रष्टाचारको अन्त्य भए मात्र देश सुशासनको बाटोमा अघि बढ्ने बताए। ‘अहिले अर्को नयाँ घटनाक्रम छ, जे घटना हुन्छ, तीन जना नेताहरु बसिहल्नुहुन्छ, किन बस्नुहुन्छ के छलफल हुन्छ? केही थाहा छैन,’ नेता कोइरालाले भने, ‘हिजो–अस्ति मात्र पनि बसिराखेको जस्तो लाग्छ। यसले के सन्देश दिइरहेको छ? के भइरहेको छ? यसले देशलाई कहाँ पुर्याउँछ? त्यसैले हामीले भ्रष्टाचारको अन्त्य गरेर सुशासनको बाटोमा अघि बढाउने हो भने मात्रै देश बनाउन सकिन्छ।’
