काठमाडौँ । पूर्वप्रधानमन्त्री डा. बाबुराम भट्टराईले आफु ललितानिवास प्रकरणमा छानविन प्रक्रियामा सहयोग पुर्याउन तयार रहेको बताएका छन् । उनले ट्वीट गर्दै उक्त जानकारी दिएका हुन् ।
उनले ट्वीटरमा लेखेका छन्, “ललितानिवास प्रकरणमा सम्मानित सर्वोच्च अदालतले दिएको निर्देशन अनुरूप छानबिन भएमा त्यसमा पूर्णरूपले सहयोग गर्न मेरो प्रतिबद्धता रहेको छ ।”
उनले अगाडि लेखेका छन्, ‘केही समय पहिले अख्तियार दुरूपयोग अनुसन्धान आयोगले गरेको छानबिनमा पनि मैले सहर्ष सहयोग गरेको सर्वविदितै छ ।’
उनले भनेका छन्, “ललिता निवासलगायत जुनसुकै प्रकरणमा राज्यका मन्त्रिपरिषद् लगायत सबै तहबाट भएका निर्णयउपर निष्पक्ष छानबिन गरेर कानुनविपरित, राज्यलाई नोक्सान हुने, निजी लाभ लिने ढंगले कार्य भएरगरेको भए जतिसुकै उच्च तहको व्यक्ति भए पनि कानुनअनुसार कारबाही गरिनुपर्छ । देशमा विधिको शासन कायम गरिनुपर्छ भन्ने मेरो आजीवन मान्यता र प्रतिबद्धता छ ।”
सर्वोच्च अदालतले आइतबार ललितानिवास प्रकरणमा उच्चपदस्थ व्यक्तिहरुको पनि छानबिन गर्ने आदेश दिएसँगै उनले यस्तो प्रतिक्रिया दिएका हुन् ।
