काठमाडौँ। नेकपा माओवादी केन्द्रका सांसद लेखनाथ दाहालले आफूले संसदीय मर्यादा उल्लंघन नगरेको दाबी गरेका छन्। शुक्रबार नेकपा एमालेको अवरोधको कारण संसद स्थगित भएपछि सञ्चारकर्मीहरुसँग कुरा गर्दै दाहालले सो दाबी गरेका हुन्।
जेठ १० गते बसेको प्रतिनिधिसभा बैठकमा बोल्ने क्रममा सांसद दाहालले
‘पशुपति नाथको जलहरी लाउँदा पनि सुन लाउने भनेर पित्तल लाइदिएर गरेका भ्रष्टाचार’ भनेका थिए। सोही अभिव्यक्तिलाई लिएर एमालेले शुक्रबार संसद बैठक अवरुद्ध गरेको छ। दाहालले संसदीय मर्यादा विपरित अभिव्यक्ति दिएकाले माफी माग्नुपर्ने एमालेको माग छ।
तर, दाहालले भने आफूले संसदीय मर्यादा उल्लंघन नगरेको दाबी गर्दै भने, ‘मैले शिष्टतापूर्वक माननीय केपी शर्मा ओली नेतृत्वको सरकारको पालामा भएको भ्रष्टाचारहरुको फेहरिस्त बताएको हुनाले मैले संसदीय मर्यादा उल्लंघन गरेको छैन।’
त्यस्तै, उनले जलहरी जलहरी राख्ने क्रममा बदमासी भएको बारे संसदीय छानबिन समिति बनाउनुपर्ने माग समेत गरेका छन्।
