काठमाडौँ। नेकपा एमालेका अध्यक्ष केपी शर्मा ओलीले संसद् अवरुद्ध हुनैपर्ने बताएका छन्। शुक्रबार पार्टी कार्यालय च्यासलमा आयोजित स्थानीय तहका जनप्रनिधिसँगै बोल्दै उनले संसद अवरुद्ध हुनैपर्ने बताएका हुन्।
आफूले जिन्दगीभरी भ्रष्टाचार विरोधी आन्दोलन चलाएको बताउँदै आफूमाथि लागेको आरोप पुष्टि गर्न चेतावनी दिए। उनले देशप्रतिको वितृष्णा जगाउन देशद्रोही काम भएको आरोप लगाए।
जेठ १० गतेको संसद्मा नेकपा माओवादीका सांसद् लेखनाथ दाहालले पशुपतिको जलहरी सुनको हुनुपर्नेमा पित्तल लगाएर भ्रष्टचार गरेको आरोप लगाएका थिए। सोहीबारे आपत्ति जनाउँदै एमालेले शुक्रबारको संसद बैठक अवरोध गरेको थियो।
‘अस्तिको दिनमात्रै माओवादीका एक सांसदले रोष्टममा उभिएर बोल्दा कोभिडको औषधिमा दुई अर्ब केपी ओलीले खायो। कहाँ गयो त्यो? पशुपतिमा सुनको जलहरी चढाउँछु भनेर पित्तलको जलहरी चढाएर भ्रष्टाचार गर्यो भनेर एकजना सांसदले बोले,’ सदन चल्न नसकेपछि पार्टी कार्यालयमा भएको कार्यक्रममा ओलीले भने, ‘संसद् अवरुद्ध हुनैपर्छ। यस्तो बकबास। जड्याहाले जाँड खाएको बेला पनि त्यस्तो कुरा बोल्दै हिँड्दैन। आधारहीन, असत्य र जनतालाई भ्रम पार्ने खालका कुरा,’ उनले भने।
उनले भ्रष्टाचार पुष्टी हुने सम्भावना नै नभएको दाबी गरे।
