काठमाडौँ। नेपाली कांग्रेसका नेता डा. शेखर कोइरालाले १०० किलो सुन प्रकरणमा प्रमुख प्रतिपक्ष दल नेकपा एमालेगरेको मागमा समर्थन जनाएका छन्। एमालेले माग गरेजस्तै डा. कोइरालाले पनि सुन तस्करी प्रकरणमा उत्तस्तरीय छानबिन समिति बनाउनु पर्ने बताएका हुन्।
डा. कोइरालाले नेपाल अन्तर्राष्ट्रिय तस्करको अखडा बनिसकेको दाबी गर्दै सुन तस्करीको छानबिनका लागि उच्चस्तरीय छानबिन समिति नै गठन गर्नुपर्ने बताएका हुन्।
कांग्रेसको संसदीय दलको बैठकमा डा. कोइरालाले १४०० टन सुन खपत हुने भारतमा ९०० टन मात्र आयात हुने गरेको तथ्यांक प्रस्तुत गरे। ‘४०० देखि ५०० टन सुन नेपालबाट जाँदैछ भन्ने बुझ्न जरुरुी छ’ प्रचण्डको सचिवालयमा काम गरेका व्यक्ति राजश्व अनुसन्धान विभागमा गएपछि सुन समातिएको भन्दै उनले भने, ‘त्यसपछिका घटनाहरु हेर्नुस्, के भइरहेको छ?’
उनले राजश्व अनुसन्धान विभागले आफ्नै बोली विर्सिएको आरोप लगाए। ‘उहाँले के बोल्नुभयो? सीआईबीलाई किन दिनुपर्यो, हामी नै सक्षम छौं भनेको बिर्सिनुभयो?’ डा. कोइरालाले भने।
नेता कोइरालाले नेकपा एमालेले किन उच्चस्तरीय छानबिन समिति गठनको माग गरिरहेको छ भनेर कहिल्यै सोच्यौं हामीले भन्दै नेतृत्वलाई प्रश्न गर्दै भने, ‘नेपाललाई तस्करको अखडाबाट बन्द गर्न यो जरुरी छ।’
प्रतिशोधको भावनाले पार्टीका नेतालाई अपहरणको शैलीमा पक्राउ गरेको भन्दै असन्तुष्टि डा. कोइरालाले जनाए।
