विराटनगर। समाजवादी मोर्चाले आज सोमबार कोसी प्रदेशको विराटनगरमा सन्देशसभा आयोजना गरेको छ। सो कार्यक्रमको ब्यानरमा प्रदेशको नाम उल्लेख भएको छैन।
प्रधानमन्त्री एवं नेकपा माओवादी केन्द्रका अध्यक्ष पुष्पकमल दाहाल प्रचण्ड समेत सहभागी कार्यक्रमको ब्यानरमा भने प्रदेशको नाम उल्लेख छैन। त्यस्तै, सो कार्यक्रममा नेकपा एकीकृत समाजवादीका अध्यक्ष एवं पूर्वप्रधानमन्त्री माधव कुमार नेपाल, पूर्वउपप्रधानमन्त्री तथा जनता समाजवादी पार्टी (जसपा)का अध्यक्ष उपेन्द्र यादव र नेपाल कम्युनिष्ट पार्टीका महासचिव नेत्रविक्रम चन्द सहभागी छन्। कार्यक्रमको ब्यानरमा समाजवादी मोर्चा प्रदेश समिति मात्र उल्लेख गरिएको छ।
तत्कालीन प्रदेश नं १ प्रदेससभाबाट फागुन १७ गते प्रदेशको नाम पारित गराउँदा प्रधानमन्त्री प्रचण्डको पार्टी माओवादी केन्द्रले समेत पक्षमा मतदान गरेको थियो। तर, जसपा एकीकृत समाजवादी पहिचानको मागसहित विपक्षमा थिए।
मोर्चामा रहेका जसपा, एकीकृत समाजवादी, माओवादीका नेताहरुले ब्यानरमा कोसी लेख्ने वा नलेख्ने विषयमा मतान्तर भएपछि प्रदेश समिति मात्र लेखिएको आयोजकले जनाएका छन्।
