बालुवाटारमा प्रधानमन्त्री प्रचण्ड र ओलीबीच भेटवार्ता

काठमाडौँ। प्रधानमन्त्री पुष्पकमल दाहाल ‘प्रचण्ड’ र नेकपा एमालेका अध्यक्ष केपी शर्मा ओलीबीच भेटवार्ता भएको छ।

उनीहरुबीच प्रधानमन्त्री निवास बालुवाटारमा आइतबार बिहान भेटवार्ता भएको हो।
भेटवार्तामा उपाध्यक्ष विष्णु पौडेल र संसदीय दलका सचेतक महेश बर्तौला पनि सहभागी छन्।

शनिबार मात्रै चीन भ्रमणबाट फर्किएका प्रधानमन्त्री दाहालले आज बिहान प्रमुख प्रतिपक्षी दलका नेताहरूलाई बोलाएका हुन्। अवैध सुन तस्करी प्रकरणको छानबिनका लागि उच्चस्तरीय समिति (जाँचबुझ आयोग) गठन गर्ने विषयमा छलफल भइरहेको बालुवाटार स्रोतले जनाएको छ।

एमालेले उच्चस्तरीय समिति गठनको मागसहित साउन महिनाभरि संसद् बैठक अवरुद्ध पारेपश्चात् आयोग गठनका लागि सहमत भए पनि आयोग गठन हुन सकेको छैन।

आज दिउँसो एक बजे प्रतिनिधिसभाको बैठक बस्दैछ। उक्त बैठकअगाडि प्रधानमन्त्री दाहालले छलफलमा बोलाएका हुन्।