काठमाडौँ। राष्ट्रिय स्वतन्त्र पार्टी (रास्वपा)का नेताहरु आममाफीको विरोधमा ध्यानाकर्षण पत्र लिएर राष्ट्रपति भवन शीतल निवास पुगेका छन्। संविधान दिवसको अवसरमा सरकारको सिफारिसमा राष्ट्रपति रामचन्द्र पौडेलले कर्तव्य ज्यानमुद्दामा दोषी ठहर भएका व्यक्तिलाई उन्मुक्ति दिएपछि त्यसको विरोधमा रास्वपा नेताहरु शीतल निवास पुगेका हुन्।
सर्वस्वसहित जेल सजाय भोगिरहेका नेपालगञ्जका गुन्डा नाइके तरुण दलका नेता योग ढकाल (रिगल)लाई उन्मुक्ति दिएको थियो। सो कदमको विरोध भइरहेको बेला रास्वपा सभापति रबि लामिछाने सहितका नेताहरु राष्ट्रपतिलाई ध्यानाकर्षण गराउन शितल निवास पुगेका हुन। ध्यानाकर्षण गराउन सभापति लामिछानेसहित महामन्त्री मुकुल ढकाल, सहमहामन्त्री कविन्द्र बुर्लाकोटी, केन्द्रीय सदस्य प्रतिभा रावललसहितका नेताहरू पुगेका हुन्।
रास्वपाले सरकारको सिफारिसमा राष्ट्रपतिबाट सजाय माफी, मुलतबी परिवर्तन वा कम गर्ने व्यवस्था विगतदेखि नै गलत प्रयोग भइरहेको उल्लेख गरेको छ।
रास्वपाले आइतबार बसेको प्रतिनिधि सभा बैठकमा पनि आममाफीबारे विरोध गरेको थियो।
