काठमाडौँ । राष्ट्रिय स्वतन्त्र पार्टी (रास्वपा)का सांसद असिम शाहले राष्ट्रिय क्रिकेट टोलीलाई दिइने भनेर घोषणा गरिएको पुरस्कार उनीहरुले नपाएकोमा असन्तुष्टि व्यक्त गरेका छन् ।
जारी प्रतिनिधिसभाको शून्य समयमा बोल्दै सांसद शाहले नेता तथा सरकारले आज एसियाडमा भारतविरुद्ध राम्रो प्रदर्शन गरेकामा क्रिकेट टोलीलाई बधाई दिन नबिर्सेको तर घोषणा गरेको पुरस्कार भने दिन बिर्सिएको भन्दै सरकारको आलोचना गरे ।
उनले भने ‘नेपाली राष्ट्रिय क्रिकेट टोलीले आज एसियाडमा भारतविरुद्ध राम्रो प्रदर्शन गरेको छ । बधाई दिन त कसैले बिर्सिएनन् होला । नेता र सरकारले पनि बधाई दियो होला । तर, पुरस्कार दिन सरकारले बिर्सेको छ । सरकारले बिर्सेको कुरा सदनमा उठाउन मलाई लाज लागिसकेको छ ।’
उनले अगाडि भने ‘खेलाडीहरुले लिग जित्दै गए सरकारले पुरस्कार घोषणा गर्दै गयो । उनीहरुले पाउनुपर्ने रकम १७ लाख पुगिसक्दा २ रुपैया पनि पाउन सकेका छैनन् । खेल खेल्न जानुस् फर्किँदा खातामा पैसा आउँछ भनेर प्रधानमन्त्रीले बोल्नुभो तर भुक्तानीको कुनै सुरसार छैन । दलाल, बिचौलिया र ठेकदारको कुरा भएको भए अग्रिम भुक्तानी हुन्थ्यो होला, ब्ल्यांक डेटमा चेक बन्थ्यो होला, खेलाडीलाई झुटो आश्वासनमा झुलाइएको छ । जितेर आएकाको त यो हाल छ भने जित्नका लागि सिक्दै गरेका हरुको हालत के होला ?’
