काठमाडौँ। प्रमुख प्रतिपक्षी नेकपा एमालेका अध्यक्ष केपी शर्मा ओलीले अहिलेको सरकार चरम अनुत्तरदायी र गैरजिम्मेवार देखिएको बताएका छन्। मंगलबारको प्रतिनिधि सभा बैठकलाई सम्बोधन गर्दै ओलीले यस्तो बताएका हुन्।
अध्यक्ष ओलीले गठबन्धन सरकारको कार्यशैलीलाई लिएर तीव्र आलोचना गरेका छन्। उनले नेपालगञ्जका चेतन मानन्धरलाई बजारमा लखेटी लखेटी हत्याका दोषी रिगल भनिने योगराज ढकाल रिगललाई माफी दिएर सरकारले अराजकता निम्त्याएको बताए। उनलाई माफी दिएपछि अहिले नेपालगञ्ज आतंकित रहेको उनले बताए।
उता पर्साकी मुस्कान खातुनलाई एसिड हान्ने घटनाका दोषीलाई पनि सरकारले माफी दिएकोमा उनले आपत्ति जनाए।
सुन तस्करी प्रकरणको छानबिन गर्न सरकार डराएको उनको आरोप छ। उनले गृहमन्त्री नारायणकाजी श्रेष्ठले हेटौँडा पुगेर सुशासन कायम गर्न खोजेको तर प्रतिपक्षले नदिएको भनी गलत आरोप लगाएको भन्दै आपत्ति पनि जनाए।
‘सुशासन रोक्न कुन विरोधी लाग्यो? साढे नौ किलो सुन भेपमा पक्राउ पर्छ, सरकार ढाकछोप गर्छ,’ उनले भने, ‘सय किलो सुनमा पक्राउ गर्छ तर छानबिन गर्न लडाइँ गर्नपर्छ। छानबिन गर्दा के बिग्रन्छरु किन डराउनु भएको छानबिनबाट? तर्सनु भएको हो?’
उनले सरकार सुशासन कायम गर्न नलागेको भन्दै सुशासनको अभियान कसरी पूरा हुन्छ भनेर प्रश्न समेत गरे। सुशासन कायम गर्नु सरकारको नियमित काम भएकाले सरकारले भ्रष्टाचार रोक्नुपर्ने उनको भनाइ थियो।
