कोशी सरकारबारे निर्णय गर्न राप्रपाले बोलायो पदाधिकारी बैठक

काठमाडौँ। कोशी प्रदेशमा नयाँ सरकार गठनबारे निर्णय लिन राष्ट्रिय प्रजातन्त्र पार्टी (राप्रपा)ले शुक्रबार बिहान पदाधिकारी बैठक बोलाएको छ।

प्रवक्ता एवम् प्रचार विभाग प्रमुख मोहन श्रेष्ठका अनुसार, शुक्रबार बिहान ८ बजे बोलाइएको बैठकले कोशी सरकारबारे समेत निर्णय लिनेछ।

कोशीमा शुक्रबार साँझ ५ बजेभित्र मुख्यमन्त्रीको दाबी गर्न समय दिइएको छ। संविधानको धारा १६८ (३) बमोजिम मुख्यमन्त्री बनेका हिक्मतकुमार कार्कीले राजीनामा दिएपछि कोशीमा अर्को उपधारा बमोजिम सरकार गठन गर्ने गृहकार्य गरिरहेका छन्।

मंगलबार राप्रपाका अध्यक्ष राजेन्द्र लिङ्देनले प्रधानमन्त्री पुष्पकमल दाहाल प्रचण्डसँग भेट गरेका थिए। भेटमा नेकपा माओवादी केन्द्रका अध्यक्ष समेत रहेका प्रचण्डले कोशी प्रदेशमा गठबन्धनलाई सहयोग गर्न आग्रह गरेका थिए। कोशीमा सरकार गठनको लागि राप्रपाको सहयोग अनिवार्यजस्तै बनेको छ।