रवि लामिछानेको प्रश्नः नरेन्द्र मोदी हाम्रो भूमिमा आउँदा सरकारले स्वागत गर्नुपर्दैन?

काठमाडौँ। भारतले अतिक्रमण गरेको नेपाली भूमि कालापानी लिम्पियाधुरा क्षेत्रमा भारतीय प्रधानमन्त्री नरेन्द्र मोदीले आज गरिरहेको भ्रमणका विषयमा प्रतिनिधिसभा बैठकमा प्रश्न उठेको छ। नेपालको अतिक्रमित भूमि र नेपालको चुच्चे नक्साले समेत समेटेको भूमिमा भारतीय प्रधानमन्त्री मोदीले नेपाली पक्षलाई कुनै जानकारी समेत नगराई आज गरिरहेको भ्रमणका बारेमा संसदमा सांसदहरुले प्रश्न उठाएका हुन्।

राष्ट्रिय स्वतन्त्र पार्टी (रास्वपा)का सभापति रवि लामिछानेले भारतीय प्रधानमन्त्री नरेन्द्र मोदीको नेपाली भूमिमा भईरहेको भ्रमणका बारेमा सरकारलाई जानकारी छ या छैन? छ भने छिमेकी मुलुकका प्रधानमन्त्री नेपालको भूमिमा आउादा स्वागत किन गरिएन भन्दै सरकारको धारणा माग गरेका छन्।

‘छिमेकी राष्ट्रका प्रधानमन्त्री हाम्रो भू–भागमा आउनुभएको रहेछ। छिमेकी राष्ट्रको प्रधानमन्त्री आउँदा न सरकारको कुनै स्वागत गरेको छ। न देशलाई जानकारी गराएको छ’ सभापति लामिछानेले भने, ‘यत्रो ठूलो भ्रमण। कुटी, गुन्जी चुच्चे नक्साभित्रै पर्छ। यसको आधिकारिकताका लागि हामीले त्यहाँ प्रमुख जिल्ला अधिकारीसँग कुरा गर्दा हामीले थाहा पायौं हामी जान पाउँदैनौं भन्नुभयो। सरकार र परराष्ट्रमन्त्रीलाई सोध्न चाहन्छु छिमेकी राष्ट्रका प्रधानमन्त्रीको भ्रमणबारे सरकारले सदन र जनतालाई जानकारी गराउनु पर्दैन? छिमेकी राष्ट्रको सरकारप्रमुख हाम्रो भूमिका आउँदा सरकारले स्वागत गर्नुपर्दैन? त्यसको औपचारिकता हुँदैन। त्यसबारे सरकारले जानकारी गराउनुपर्‍यो।’