गाजाको अस्पतालमा गरिएको आक्रमणप्रति एमालेको निन्दा

काठमाडौँ। नेकपा एमालेले गाजामा भएको आक्रमणको निन्दा गरेको छ। गएराती गाजा शहरको अल अहरी अरब अस्पतालमा भएको आक्रमणप्रति एमालेले निन्दा गरेको हो।

एमालेका अध्यक्ष केपी शर्मा ओलीले आक्रमणबाट अस्पतालमा उपचार गराइरहेका बिरामी, उपचारमा संलग्न चिकित्सक तथा स्वास्थ्यकर्मी, बिरामीका कुरुवा÷आफन्त र अस्पताल परिसरमा शरण लिइरहेका नागरिक गरी ५०० भन्दा बढी मारिएको खबरले स्तब्ध भएको बताएका छन्।

‘रकेट आक्रमणबाट ठूलो विस्फोटसहित सिङ्गो अस्पताल भवन नष्ट हुनुका साथै बालबालिकासहित सयौंको सङ्ख्यामा मानिसहरू हताहत भएको विषय जाति निन्दा गरे पनि कमी हन्छ। हामी यस आक्रमणको कडा शव्दमा निन्दा र भत्सना गर्दछौँ,’ विज्ञप्तीमा उल्लेख छ।

एमाले शान्तिको पक्षमा रहेको उल्लेख गर्दै जुनसुकै खाले द्वन्द्व र समस्याको समाधान शान्तिपूर्ण वार्ताद्वारा गरिनुपर्छ भन्ने मान्यता राख्ने बताएका छन्।