पूर्वगृहमन्त्री खाणलाई पार्टीबाट निलम्बन गर्नुपर्छः गगन थापा

काठमाडौँ। नेपाली कांग्रेसका महामन्त्री गगन थापाले नक्कली शरणार्थी प्रकरणमा पक्राउ परेका पार्टीका नेता एवं पूर्व गृहमन्त्री समेत रहेका बालकृष्ण खाणलाई पार्टीबाट निलम्बन गर्नुपर्ने बताएका छन्। बुधबार प्रजातान्त्रिक विचार समाजको महाधिवेशनलाई सम्बोधन गर्दै थापाले सो कुरा बताएका हुन्।

विधिको शासन भएपछि कानुनी प्रक्रिया सबैले पालना गर्नुपर्ने भन्दै थापाले भने, ‘नक्कली भुटानी शरणार्थी प्रकरणमा पार्टीको एकजना नेता मुछिनुभएको छ। विधिको शासन भएपछि कानुनी प्रक्रिया सबैले पालना गर्नुपर्छ। अनुसन्धानबाट दोषी हुनुहुन्छ भने सजाय पाउनैपर्छ। यो राष्ट्रविरुद्धको द्रोहजस्तो अपराधमा अनुसन्धान गरेर जो जो मुछिनुहुन्छ सबैलाई कारबाही गर्नुपर्छ।’

यद्यपी महामन्त्री थापाले कसैसँग पूर्वाग्रह राखेर नभनेको बताए।