नेपाली कांग्रेस संसदीय पद्धतिको हिमायती पार्टी होः रमेश लेखक

काठमाडौँ। नेपाली कांग्रेस संसदीय दलको प्रमुख सचेतक रमेश लेखकले कांग्रेस संसदीय व्यवस्थाको हिमायती पार्टी भएको बताएका छन्। बिहीबार प्रतिनिधिसभा बैठकमा बोल्दै प्रमुख सचेतक लेखकले नेपाली कांग्रेस संसदीय पद्धतिमा पूर्ण विश्वास गर्ने बताएका हुन्।

‘लोकतान्त्रिक व्यवस्थाका सबै आधारभूत तत्वहरूलाई अंगिकार गरेका छौं। गणतन्त्रात्मक शासन पद्धतिमा गएका छौं। संसदीय शासन प्रणाली हो भनेका छौं,’ लेखकले भने, ‘संसदीय शासन प्रणालीको मियो संसद् हो। यसैले संसदको प्रभावकारीता आवश्यक छ।’

संसद प्रभावकारी भए यो प्रणाली प्रभावकारी हुने उनले जिकिर गरे। उनले संसद कमजोर भयो भने व्यवस्थाको प्रभावकारिता कमजोर हुने बताए। त्यसैले संसदलाई प्रभावकारी बनाउनुपर्ने बताए। सरकारलाई सदनप्रति उत्तरदायित्व बनाउने काम पनि संसदकै भएको उनको भनाइ छ।

कांग्रेस सांसद लेखकले संविधानमा परिकल्पना गरेअनुसार बाटोमा मुलुकलाई अगाडि लैजान सकिने औंल्याए।