पौडेललाई वर्षमानको जवाफः जनयुद्ध दिवस मनाउने निर्णय हुँदा तपाई उपप्रधानमन्त्री हुनुहुन्थ्यो

काठमाडौँ। जनयुद्ध दिवस मनाउनेबारे नेकपा माओवादी केन्द्रका उपमहासचिव वर्षमान पुनले नेकपा एमालेका उपाध्यक्ष विष्णु पौडेललाई जवाफ दिएका छन्।

बिहीबार बसेको प्रतिनिधि सभा बैठकमा एमाले उपाध्यक्ष पौडेलले जनयुद्ध सुरू भएको दिनलाई उत्सवका रुपमा लिन नसकिने बताएका थिए। उनले जनयुद्ध दिवसका दिन सार्वजनिक विदा दिने निर्णय फिर्ता लिन आग्रह गरेका थिए। फिर्ता लिन नसके सदनमा प्रस्ताव ल्याउन उनले चुनौती दिएका थिए।

जवाफमा माओवादीका उपमहासचिव पुनले एमाले समेत सहभागी सरकारले जनयुद्ध दिवस मनाउने निर्णय गरेको स्मरण गराए।

‘जनयुद्ध दिवसको बारेमा म स्मरण गराउन चाहन्छु (माघ १९ गते त्यो निर्णय भएको रहेछ। पूर्व वक्ता (विष्णु पौडेल) माननीय ज्यू उपप्रधानमन्त्री हुनुहुँदो रहेछ। त्यही मन्त्रिपरिषदले निर्णय गरेको रहेछ’ पौडेललाई पुनले जवाफ फर्काए। आफैँले निर्णय गर्ने र अर्को ठाउँमा पुगेर आलोचना गर्ने संस्कार गलत भएको उनको भनाई छ।