काठमाडौँ। जनता समाजवादी पार्टी नेपालका अध्यक्ष उपेन्द्र यादवले सत्तारूढ दलहरूले नै सङ्घीयता खारेज गर्छन् कि भन्ने आशङ्का व्यक्त गरेका छन्। बिहीवार प्रतिनिधिसभाको बैठकमा अध्यक्ष यादवले अहिलेसम्म सङ्घीय निजामती ऐन र प्रहरी समायोजन ऐन नल्याएको भन्दै सत्तारूढ दलहरूले नै सङ्घीयता खारेज गर्छन् कि जस्तो देखिएको बताएका हुन्।
उनले प्रदेशलाई अधिकार, कानुन र काम गर्ने आवश्यक जनशक्ति नदिँदा सङ्घीय लोकतान्त्रिक गणतन्त्र कसरी टिक्छ भनेर प्रश्नसमेत गरे।
‘अहिलेसम्म सङ्घीय निजामती ऐन निर्माण गरिएन। एक जना माननीयले सङ्घीयता खारेज गरौँ भन्नु हुन्थ्यो। यहाँ भन्नै पर्दैन, यतैबाट खारेज गर्दिन्छन् कि जस्तो पो देखियो त आठ–आठ वर्षसम्म सङ्घीय ऐन नबनाउनु, प्रहरी ऐन बनेको पनि कार्यान्वयन नहुनु र प्रदेशहरूलाई अधिकार, कानुन र काम गर्ने आवश्यक जनशक्तिसमेत नदिने अवस्थाले कसरी सङ्घीय गणतन्त्र टिक्छ? कसरी सङ्घीय गणतन्त्र संस्थागत हुन्छ?’ उनले भने।
अध्यक्ष यादवले आउँदा दिनमा लामो समयसम्म संसद् अवरुद्ध हुने र संसदमा विधेयक नल्याउने प्रवृत्तिको अन्त्य हुनुपर्ने पनि बताए।
