कोशी । कोशी प्रदेशका मन्त्री रामबहादुर रानामगरले पदबाट राजीनामा दिएका छन् । केही हप्ता अगाडि मुख्यमन्त्री केदार कार्कीले सत्ता साझेदार दल नेकपा (एमाले) को तर्फबाट नियुक्त बिनाविभागीय मन्त्री मगरले आज पदबाट राजीनामा दिएका हुन् । बिहान मुख्यमन्त्री केदार कार्कीसँग भेटेर उनले राजीनामा दिएका हुन् ।
सहमति विपरीत सरकार विस्तार गरेको भन्दै उनले राजीनामा दिएका हुन् ।
संविधानको धारा १६८ को उपधारा ५ बमोजिम नेकपा एमालेका ३९ जना र नेपाली काँग्रेसका संस्थापनको निर्णय अस्वीकार गरेका आठजना सांसद मिलेर कोशी प्रदेशमा असोज २७ गते केदार कार्की मुख्यमन्त्री बनेका थिए ।
मुख्यमन्त्रीले असोज २८ गते नेपाली काँग्रेसका शम्सेर राई र नेकपा एमालेका मगरलाई मन्त्री नियुक्त गरी सानो मन्त्रिपरिषद् गठन गरेका थिए ।
मन्त्री पदबाट राजीनामा दिएका उनले सरकारलाई दिएको समर्थनको विषयमा बताएका छैनन् ।
संविधानको धारा १६८ को उपधारा ५ मा सांसदहरुले मुख्यमन्त्रीलाई व्यक्तिगत रुपमा समर्थन गर्ने व्यवस्था भएकाले दलले एकमुष्ठ समर्थन फिर्ता लिने व्यवस्था संविधानमा छैन ।
मुख्यमन्त्री नियुक्तिका लागि समर्थन दिएका सांसदहरुले समर्थन फिर्ता लिने तथा फिर्ता लिएपछि संसदबाट फेरि विश्वासको मत लिन पर्ने कि नपर्ने भन्ने विषयमा पनि संविधान मौन छ ।
