काठमाडौँ। नेकपा एकीकृत समाजवादीका नेता झलनाथ खनालले राजतन्त्र फर्कने कुरा असम्भव भएको बताएका छन्। बिहीबार भएको पत्रकार भेटघाट कार्यक्रममा बोल्दै पूर्वप्रधानमन्त्री समेत रहेका नेता खनालले सो कुरा बताएका हुन्।
उनले पूर्वराजा ज्ञानेन्द्रलाई गुण्डागर्दी नमच्याउन चेतावनी समेत दिएका छन्। उनले धमिलो पानीमा माछा मार्नेहरू सक्रिय हुन थालेको र लोकतन्त्र र गणतन्त्रका लागि लड्ने नेतामाथि नाराबाजी गर्ने अभियान नै चलेको बताए।
‘म यहाँ आउनुअघि सोचे, कतै यहाँ मण्डले गुण्डा त प्रवेश गरेका होइनन्। एउटा कार्यक्रममा केही मान्छेले बोल्न समय मागे। जथाभावी बोले। सबै पार्टी र नेताविरुद्ध विशेषगरी मेरा विरुद्ध नारा लगाए।’
पत्रकार भेटघाटमा उनले मण्डले बिउत्याउन कोसिस भइरहेको आरोप लगाए। उनले पूर्वराजा ज्ञानेन्द्रको इसारामा यो सब भइरहेको बताए। साथै मन्दिर धाउँदैमा राजतन्त्र नफर्कने खनालको भनाइ छ।
‘ज्ञानेन्द्र शाहलाई भन्न चाहन्छु, खबरदार देशमा गुण्डागर्दी मच्चाउने इच्छा पूरा हुनेवाला छैन। दिउँसै आकाशतिर फर्केर हेरेको सपना हो। एकपटक जन्मेको बालक भित्र पस्न सक्दैन। राजतन्त्र नेपाल धर्तीमा फर्किने वाला छैन। मन्दिर नगए हुन्छ,’ खनालले भने।
उनले नारायणहिटीमा फेरि मुकुट लगाएर जाने दिवा स्वपना भएको भन्दै नागरिक अभिनन्दन खानु राप्रपालाई केही भोट बढाउने कुरा मात्र भएको बताए।
