काठमाडौँ । इलाम र बझाङमा हुने उपनिर्वाचनका लागि २० वटा राजनीतिक दलले निवेदन दिएका छन् ।
प्रतिनिधिसभातर्फ २० र प्रदेश सभातर्फ १९ वटा राजनीतिक दलले निवेदन दिएका हुन् । निर्वाचन आयोगले दल दर्ताका लागि फागुन २४ गतेदेखि ३० गतेसम्मका लागि समय दिएको थियो ।
उक्त निवेदनमाथि जाँचबुझ गरेपछि दर्ताको निर्णय गरिने आयोगको कानुन तथा राजनीतिक दल व्यवस्थापन महाशाखाले जनाएको छ । उपनिर्वाचनका लागि नेपाली कांग्रेस, नेकपा एमाले, माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनता समाजवादी पार्टी, एकीकृत समाजवादीलगायतका दलले दर्ताको निवेदन दिएका छन् ।
रास्वपाले भने प्रतिनिधिसभामा मात्रै उम्मेदवारी दिएकाले प्रदेशतर्फ १९ निवेदन परेको हो । प्रतिनिधिसभातर्फ इलाम क्षेत्र नम्बर २ मा उपनिर्वाचन हुँदैछ भने प्रदेशसभातर्फ बझाङ क्षेत्र नम्बर १ ‘क’ मा उपनिर्वाचन हुँदैछ ।
