काठमाडौँ । जनता समाजवादी पार्टी (जसपा) नेपालका अध्यक्ष उपेन्द्र यादवले व्यक्तिगत महत्त्वाकाङ्क्षा कारण आफ्नो पार्टी विभाजन भएको बताएका छन् ।
‘पार्टी विभाजन गर्ने कुनै आधार नै छैन, उनीहरुले कुनै कारण नै देखाउन सकेको छैन । कसलाई के पुगेको छैन मलाई भनेको भए त्यो पनि दिन्थे,’ बुधबार पार्टी कार्यालयमा आयोजित पत्रकार सम्मेलनमा उनले भने, ‘पार्टी विभाजन गर्नेमध्ये एक जनालाई कार्यवाहक अध्यक्ष नै दिएर गएको थिए, एक जना मन्त्री नै हुनुहुन्छ, अरू सांसद नै हुनुहुन्छ, एक जना संसद्को सचेतक नै हुनुहुन्छ नपुगेको के थियो र !’
पार्टीभित्र कुनै सैद्धान्तिक, वैचारिक, साङ्गठनिक, पद र जिम्मेवारी बाँडफाँट, सरकारमा जाने आउने विषयमा मतभेद नभएको भन्दै पार्टी विभाजनको एउटै कारण व्यक्तिगत महत्त्वाकाङ्क्षा भएको उनले बताए ।
आफूहरु संसदीय दल, केन्द्रीय समिति, कार्यकारिणी समिति सबै ठाउँमा बहुमतमा रहेको दाबी यादवको छ ।
