काठमाडौँ । नेकपा एकीकृत समाजवादीको पदाधिकारी र पोलिटब्युरो चयनका लागि आज निर्वाचन हुँदैछ ।
१८ पदाधिकारीसहित पोलिटब्युरो सदस्य छनौट गर्नका लागि आज निर्वाचन हुने भएको हो । सोमबार सम्पन्न भएको केन्द्रीय कमिटी बैठकबाट सहमति हुन नसकेपछि निर्वाचनको माध्यमबाट पदाधिकारी तथा पोलिटब्युरो सदस्य छनौट गर्ने निर्णय भएको थियो । उक्त निर्णयअनुसार पार्टीको निर्वाचन आयोगले मतदाताको नामावली प्रकाशन र अन्य प्रक्रिया थालेको छ ।
एकीकृत समाजवादीमा तीन सय ४४ सदस्यीय केन्द्रीय कमिटीको व्यवस्था भए अनुसार वरिष्ठ उपाध्यक्ष, उपाध्यक्ष, उपमहासचिव, सचिव र कोषाध्यक्षको १८ पद र ८४ पोलिटब्युरो सदस्य छनौट गर्न निर्वाचन हुन लागेको हो ।
आज बिहानबाट उम्मेदवारी दर्ता, दाबी विरोध, उम्मेदवारी फिर्ता, अन्तिम नामावली प्रकाशनलगायतका कार्यक्रम शुरु हुनेछ भने दिउँसो २ बजेदेखि पाँच बजेसम्म मतदान र साँझसम्म मतगणना गरिने निर्वाचन आयोगले जनाएको छ ।
