कांग्रेसमा नेतृत्व हस्तान्तरण हुनुपर्छः गगन थापा

विराटनगर। नेपाली कांग्रेसका महामन्त्री गगन थापाले पुस्तान्तरणका लागि कांग्रेसमा नेतृत्व हस्तान्तरण हुनुपर्ने बताएका छन्। मंगलबार विराटनगर विमानस्थलमा सञ्चारकर्मीहरूसँग कुराकानी गर्दै थापाले सो कुरा बताएका हुन्।

उनले पार्टी सभापति शेरबहादुर देउवाले पार्टी नेतृत्व हस्तान्तरण गर्नुपर्नेमा जोड दिए। अहिलेको माग नै पार्टीमा पुस्तान्तरण र नयाँ नेतृत्वको भएको बताए।

‘अहिलेको माग नै पार्टीमा पुस्तान्तरण र नयाँ नेतृत्वको हो। त्यसैले अब सभापतिले प्रधानमन्त्री वा अन्य पदमा दाबी गर्नु हुँदैन,’ थापाले भने।

देउवाले विगत पाँच पटक प्रधानमन्त्रीको जिम्मेवारीवहन गरिसकेको हुँदा संसदीय कार्यकालमा पार्टीको नयाँ नेतृत्वमा सरकार बन्ने बताए। उनले भने,’पाँचपटक प्रधानमन्त्री बनिरहँदा देश र जनताका लागि थुप्रै काम भएका छन्। उहाँप्रति सम्मान छ। अब भने कांग्रेसतर्फ नयाँ ब्यक्ति प्रधानमन्त्री भएको हेर्न चाहेको छ। त्यसमा जोपनि हुनसक्छ। यसका निम्ती पार्टी नेतृत्व हस्तान्तरण गर्ने र पार्टीतर्फबाट प्रधामन्त्री हुने ब्यक्तिलाई मार्गप्रशस्त गरिदिँदा उहाँ र पार्टीको हितमा छ।’