काठमाडौं । नेकपा एमालेका महासचिव शंकर पोखरेलले पूर्वउपाध्यक्ष भीम रावललाई पार्टीले साधारण सदस्यबाट निष्काशित गरेको नभई आफैं निक्लिएको बताएका छन् ।
शुक्रबार प्रेस चौतारी नेपाल चितवनले आयोजना गरेको पत्रकार सम्मेलनमा बोल्दै पोखरेलले भने, ‘हरेक पार्टीका निर्णय र नीतिको विपक्षमा अभियान चलाएर हिँडेपछि पार्टी सदस्य हो भनिरहन मिल्छ र ? त्यस अर्थमा रावलजीलाई हामीले निकालेको होइन, रावलजी आफैँ निक्लिएको हो भन्ने बुझ्नु पर्दछ ।’
रावल आफू नेतृत्वमा रहेको ठाउँमा अरूलाई जङ्गी शासन लगाउने तर आफू अनुशासनमा नबस्ने प्रवृत्तिको नेता भएको पोखरेलको भनाइ छ । एमालेले रावललाई सुध्रिने अवसर दिए पनि उनी नसुध्रिएको पोखरेलको बुझाइ छ ।
पार्टीले स्पष्टीकरण सोध्दा समेत त्यसलाई रावलले बेवास्ता गरेको पोखरेलले बताए । त्यसको अर्थ उनले पार्टी छाडिसकेको पोखरेल बताउँछन् । पुस १० गते बसेको एमाले सचिवालय बैठकले पूर्वउपाध्यक्ष रावललाई पार्टीको साधारण सदस्य समेत नरहने गरी निष्काशित गर्ने निर्णय गरेको थियो ।
