काठमाडौं । नेकपा एमाले निकट विद्यार्थी संगठन अनेरास्ववियुको अध्यक्षमा डाक्टर सुजन कडरिया निर्वाचित भएका छन् ।
२४ औँ राष्ट्रिय महाधिवेशनबाट कडरियाको नेतृत्वमा नयाँ कार्यसमिति चयन भएको हो । निर्वाचनबाट डाक्टर सुजन कडरिया ७ मतान्तरले अध्यक्षमा निर्वाचित भएका छन् । उनले ७ सय ३२ मत प्राप्त गर्दा उनका प्रतिस्पर्धी प्रकाश पौडेलले ७ सय २४ मत प्राप्त गरेका छन् ।
खुला उपाध्यक्षतर्फ विकास श्रेष्ठ ७ सय ८ मतसहित र महिलातर्फ अञ्जना सिवाकोटी ७ सय ७५ मतसहित निर्वाचित भएका छन् । महासचिव पदमा दीपक धामी ७ सय ८५ मत प्राप्त गरी विजयी भएका छन् भने उपमहासचिवमा कमल ८ सय १६ मत प्राप्त गरी निर्वाचित भएका छन् ।
त्यसैगरी, चार जना सचिव पदमा आकाश घर्ती मगर, रचना सापकोटा, समिम बाबु खानर गोपाल नेपाल विजयी भएका छन । केन्द्रीय आयोगतर्फ निर्वाचन आयोगको अध्यक्षमा जित प्रसाद सिटौला, उपाध्यक्षमा प्रविन गिरी र सचिवमा विशाल पराजुली विजयी भएका छन । लेखा आयोगको अध्यक्षमा अञ्जलि लम्साल, उपाध्यक्षमा समीक्षा ढकाल र सचिवमा गगनसिंह बस्नेत विजयी भएका छन् ।
अनुशासन आयोगको अध्यक्षमा सुमन घिमिरे, उपाध्यक्षमा आकाश गिरी र सचिवमा स्मृति अधिकारी विजयी भएको निर्वाचन समितिले जनाएको छ । नीति योजना तथा अनुसन्धान आयोगको अध्यक्ष प्रकाश विष्ट, उपाध्यक्षमा योगेश बम र सचिवमा विष्णु पाण्डे विजयी भएका छन ।
जेठ २५ गतेदेखि काठमाडौंको कीर्तिपुरस्थित त्रिभुवन विश्वविद्यालयमा जारी महाधिवेशन बिहीबार नयाँ नेतृत्वको लागि निर्वाचन भएको हो ।
