स्थगित प्रतिनिधिसभाको बैठक पुनः सुरु

काठमाडौँ। १५ मिनेटका लागि स्थगित प्रतिनिधिसभाको बैठक पुनः सुरु भएको छ। सभामुख देवराज घिमिरेको ‘रुलिङ’ मान्ने र नमान्ने विवादका कारण मंगलबार प्रतिनिधिसभाको बैठक स्थगित गरिएको थियो।

बैठकमा नेपाली कांग्रेसले सभामुखको रुलिङ स्वीकार गर्दै अघि बढ्न प्रस्ताव गरेको थियो। तर, नेकपा एमालले रुलिङमा एकरूपता हुनुपर्ने भन्दै अस्वीकार गरेपछि सभामुख घिमिरेले बैठक नै १५ मिनेटका लागि स्थगित गरेका थिए।

बैठक पुनः सुरु भएपश्चात् सभामुख घिमिरेले बजेट कार्यक्रम समावेश पुस्तिकामा प्रदेशको नाम उल्लेख हुनुपर्नेमा सो नभएको विषयमा ध्यानाकर्षणसहित सच्याउनका लागि यसअघि नै निर्देशन दिइसकेको बताए। बाँकी रहेका त्रुटि पनि तत्काल सच्याउन उनले निर्देशन दिए।

सभामुख घिमिरेले सहरी विकास मन्त्रालयले पनि प्रदेशको नामको सट्टा अंक प्रयोग गरेकामा त्यसलाई सच्याउन निर्देशन दिए।