काठमाडौँ। नेपाल समाजवादी पार्टीका अध्यक्ष डा. बाबुराम भट्टराईले संयुक्त सरकार गठनको प्रस्ताव गरेका छन्। पूर्वप्रधानमन्त्री समेत रहेका डा. भट्टराईले सामाजिक संजालमा एक पोस्ट गर्दै संयुक्त सरकार गठनको प्रस्ताव गरेका हुन्।
पालैपालो कुर्सी साटासाटमा समय खेर फाल्नुको सट्टा यो संसदको कार्यकालसम्म प्रमुख दलहरूको संयुक्त सरकार निर्माण गर्नुपर्ने उनको सुझाव छ।
उनले संविधान र कानुन आवश्यक सुधार,शान्ति प्रक्रियाका बाँकी कामको समापन,थप जटील बन्दै गएको भूराजनीतिको कुशल व्यवस्थापन र जनसरोकारका तात्कालिक मुद्दाहरूको सम्बोधन हुनुपर्ने बताएका छन्।
‘गत आमचुनाव यताको नेपाली राजनीतिको दिशा र गति झन्नझन् उतारचढावपूर्ण बन्दै जानु देश र जनताकोनिम्ति हितकर छैन! विद्यमान निर्वाचन प्रणालीमा अन्तर्निहीत अस्थीरता, दलका प्रमुख नेताहरूको अल्पदृष्टि र असीमित महत्वाकांक्षा, भूराजनीतिको निरन्तर दृश्यअदृश्य दबाब, राज्यका स्थायी अंगहरूको क्षयीकरण÷भ्रष्टीकरण आदि यसका प्रमुख कारण हुनसक्छन्’ भट्टराईले सामाजिक सञ्जालमा लेखेका छन्, ‘यस्तो अवस्थामा पालैपालो कुर्सी साटासाटमा समय खेर फाल्नुसट्टा यो संसदको कार्यकालसम्म प्रमुख दलहरूको संयुक्त सरकार निर्माण,संविधान र कानूनमा आवश्यक सुधार,शान्तिप्रक्रियाका बाँकी कामको समापन, थप जटील बन्दै गएको भूराजनीतिको कुशल व्यवस्थापन, जनसरोकारका तात्कालिक मुद्दाहरूको सम्बोधन गर्दा ठीक होला कि? नत्र समयले कसैलाई नपर्खन सक्छ!’
