काठमाडौँ । नेकपा एमालेका सचेतक एवं प्रतिनिधिसभा सदस्य महेश कुमार बर्तौलाले सरकारको पशु चौपायामा लाग्ने लम्पी स्कीन रोगका कारण किसान मारमा परे पनि सरकारले बेवास्ता गरेको आरोप लगाएका छन् ।
मंगलबार प्रतिनिधिसभा बैठकमा बोल्दै उनले मकवानपुरमा २ सय भन्दा बढी गाईहरू यो रोगबाट मरिसके पनि सरकाको ध्यान नपुगेको बताएका हुन् ।
उनले भने – ‘सरकारको आँखा र कान छ भने पटक–पटक यो संसदमा लम्पी स्कीन रोगका बारेमा पटक–पटक माननीयज्यूहरुले कुरा राख्नुभयो, मैले पनि थुप्रै पटक यो विषय राखेँ । मकवानपुरमा २ सय भन्दा बढी गाईहरू यो रोगबाट मरिसके । ५ हजारभन्दा बढी गाईहरू सङ्क्रमित छन् । देशका धेरै भागहरूमा यसको असर छ । पटक–पटक भनियो, सरकार देख्दैन, सरकार सुन्दैन ।’
यस्तै, यस समस्या समाधानमा, पीडित गाईपालक किसानलाई राहत र क्षतिपूर्ति दिन सचेतक बर्तौलाले सरकारसँग माग समेत गरे । साथै भीषण असिनापानीका कारण मकवानपुरगढी गाउँपालिकाका सबै वडाहरूमा तरकारी बाली अन्नबाली तहस नहस भएको जानकारी गराउँदै उनले क्षतिको सङ्कलन गरेर क्षतिपूर्तिको व्यवस्था गर्न पनि सरकारसँग आग्रह गरे ।
