कोशी प्रदेशमा सरकार गठनका लागि सत्ता गठबन्धनले आज दाबेदारी पेस गर्ने

काठमाडौँ। कोशी प्रदेशमा सरकार गठनका लागि सत्तारुढ गठबन्धनले आज दाबेदारी पेस गर्ने निर्णय गरेको छ। बिहीबार बिहान प्रधानमन्त्रीको सरकारी निवासमा बसेको बैठकले आज अपराह्न ५ बजेतिर दाबेदारी पेस गर्ने निर्णय गरेको हो।

बैठकमा सहभागी नेकपा एकीकृत समाजवादीका उपाध्यक्ष राजेन्द्र पाण्डेका अनुसार नेपाली कांग्रेस प्रदेश संसदीय दलका नेता उद्धव थापाको नेतृत्वमा सरकार गठनका लागि बिहीबार साँज ५ बजे प्रदेश प्रमुखसमक्ष दाबेदारी पेस हुनेछ।

गठबन्धनका दलहरुले यसअघि नै थापालाई मुख्यमन्त्री बनाउने निर्णय गरेका थिए।

कोशी प्रदेशका प्रमुख पर्शुराम खापुङले सरकार गठनका लागि दिएको समयसीमा आज बिहीबार नै सकिँदैछ। प्रदेश प्रमुख खापुङले असार १७ गते, आइतबार संविधानको धारा १६८ को उपधारा (२) बमोजिम दुई वा दुईभन्दा बढी दल मिलेर सरकार गठनको दाबी पेस गर्न आह्वान गरेका थिए।