काठमाडौँ। नेकपा एमालेका अध्यक्ष केपी शर्मा ओलीले भारत भ्रमणका क्रममा प्रधानमन्त्री पुष्पकमल दाहाल प्रचण्डले ‘रअ’का प्रमुखलाई गोप्य रुपमा भेटेर निम्ता दिएको दाबी गरेका छन्।
शुक्रबार स्ववियु काउन्सिलको राष्ट्रिय भेलालाई सम्बोधन गर्दै उनले प्रधानमन्त्री प्रचण्डमाथि प्रश्न उठाएका हुन्। आफूले सार्वजनिक रुपमा भेटेपनि प्रधानमन्त्री प्रचण्डले भारत भ्रमणका क्रममा निवासमै पुगेर भेट गरेको ओलीको दाबी छ।
‘भारतबाट ‘रअ’का प्रमुख नेपाल आए, म सँग भेट्छु भने। नेपाल आए। भेट्छु भन्दा मैले भेटेँ। त्यो कुरा कुनै लुकाएको छैन, मैले सार्वजनिक ढंगले भेटेँ। सार्वजनिक ढंगले फिर्ता गरेँ,’ ओलीले सम्बोधनका क्रममा भने, ‘यसपल्ट प्रचण्डजी दिल्ली जानुभयो उनको निवासमा पुगेर गोप्य निमन्त्रण दिएर आउनुभयो। मैले त्यस्तो गोप्य निमन्त्रणा गरेको होइन, उनको निवासमा गएर भेटेको होइन। मैले भेट्न आएको ठाउँमा भेटेको हो।’
साथै, उनले उक्त भेटबारे स्वीकार समेत गर्न नसकेको बताए। ‘उहाँले मान्छे लगाउनुहुन्छ, उहाँका छन् नि गुरिल्लाहरु टन्नै। तर म प्रचण्डजीलाई भन्दिनँ चाहन्छु, यस्ता कुराहरुको धाक हामीसँग नलाए हुन्छ।’
ओली छिमेकी देश भारतले नेपालको सरकार बनाउँछु कहिल्यै नभनेको उनले बताए। प्रधानमन्त्री प्रचण्डले प्रितम सिंहको नाम जोडेर झुट बोलेको ओलीले आरोप लगाए।
‘दिल्लीले हामीकहाँ कोही आएको भनेको छैन। प्रितम सिंहले पत्रकार सम्मेलन गरिगरि भन्नुहुन्छ म प्रचण्डलाई प्रधानमन्त्री बनाउँन दिल्ली गएको होइन। उहाँले किन भन्नुहुन्छ तर म गएको छैन भनेर। प्रितम सिंहलाई पनि बेकार मुछ्नुभयो। भारतले नेपालमा सरकार बनाउँछु अहिलेसम्म भनेको छैन। दिल्लीले भन्दैन तर, नेपालको प्रधानमन्त्री भनिरहेका छन् , संसदले सरकार बनाउँदैन दिल्ली बनाउँछ।’ ओलीले भने।
