काठमाडौँ। नेकपा एमालेका अध्यक्ष तथा संसदीय दलका नेता केपी शर्मा ओलीले संसद प्रधानमन्त्री पुष्पकमल दाहाल प्रचण्डले बन्द गराएको बताएका छन्।
आइतबार बसेको शीर्ष नेताहरुको बैठकमा सदन सुचारु गर्ने सहमति भए पनि एमाले पुनः सहमतिबाट पछि हटेको हो। सहमति अनुसार प्रधानमन्त्री प्रचण्डले संसदलाई सम्बोधन गर्ने कार्यसूची रहेको थियो। तर, एमालेले भने प्रधानमन्त्री प्रचण्डको राजीनामाको अडान दोहोर्याएका छन्।
अध्यक्ष ओलीले आइतबार दिउँसो संसद् भवन परिसरमा पत्रकारहरूसँग कुरा गर्दै भने, ‘संसद प्रधानमन्त्रीले बन्द गराउनु भएको हो, हामीले होइन। उहाँले हामीमाथि गम्भीर आरोप लगाउनु भएको छ, त्यो फिर्ता लिनु भएको छैन। त्यो कायम राखेर सहमति हुँदैन।’
प्रधानमन्त्रीले राजीनामा दिएमात्रै सहमति जुट्ने ओलीको हडान रहेको छ। ‘प्रचण्डको २१ गतेको वक्तव्य हेर्नुहोस हाम्रो राजीनामा नै माग छ। राजीनामा दिएपछि सहमति जुट्छ,’ ओलीले भने।
