प्रधानमन्त्री पत्नीको निधनपछि कांग्रेस बैठक स्थगित

काठमाडौँ। नेपाली कांग्रेसको केन्द्रीय कार्यसमिति बैठक स्थगित भएको छ। बुधबारदेखि सुरु हुने भनिएको बैठक प्रधानमन्त्री एवम् नेकपा माओवादी केन्द्रका अध्यक्ष पुष्पकमल दाहाल प्रचण्डकी पत्नी सीता दाहालको निधन भएकाले स्थगित भएको हो।

आज बोलाइएको पदाधिकारी र केन्द्रीय समिति बैठक स्थगित भएको महामन्त्री गगन थापाले जानकारी दिए। आज स्थगित भएको बैठकलाई कांग्रेसले साउन २ गते बोलाउन तयारी गरेको छ।

सीताको बुधबार बिहान ८ः३३ बजे उपचारको क्रममा नर्भिक अस्पतालमा निधन भएको छ। हाल उनको शव पार्टी केन्द्रीय कार्यालय पेरिसडाँडामा राखिएको छ। उनको पशुपति आर्यघाटमा दिउँसो २ बजे दाहसंस्कार गरिने प्रचण्डको सचिवालयले जनाएको छ।

केन्द्रीय केन्द्रीय समिति बैठकअघि नै आज बिहान ९ बजे कांग्रेस सभापति शेरबहादुर देउवाले आफ्नै निवास धुम्बाराहीमा पार्टीका पदाधिकारी र पूर्वपदाधिकारीहरूको बैठक बोलाएका थिए।