लम्पी स्किनबारे जानकारी गराउन सभामुखको रुलिङ

काठमाडौँ। प्रतिनिधिसभा सभामुख देवराज घिमिरेले पशुमा महामारीका रूपमा फैलिएको लम्पी स्किनको रोकथामका विषयमा सदनलाई जानकारी गराउन रुलिङ गरेका छन्।

सभामुख घिमिरेले सरकारले पशु चौपायामा महामारीका रूपमा देखिएको समस्या समाधानबारे सदनलाई जानकारी दिन सरकारलाई रुलिङ गरेका हुन्।

लम्पी स्किनले देशभरि किसानलाई ठूलो क्षति पुगेको भन्दै सांसदहरूले गाउँ गाउँमा प्राविधिक पठाउन माग गरेका थिए। यसैगरी संसदमा एमाले सांसद पदम गिरीले लम्पी स्किन रोग रोकथाम तथा नियन्त्रणका लागि पशु स्वास्थ्यकर्मी परिचालन गर्न माग गरेका छन्।

सांसद गिरीले लम्पी स्किनबाट किसानले पालेका पशुचौपाय धमाधम मर्न थालेको भन्दै यथाशीघ्र पशु स्वास्थ्यकर्मी परिचालन गर्न सरकारसँग माग गरेका हुन्।