अर्जेन्टिना र दक्षिण अफ्रिकाको बराबरी

एजेन्सी । फिफा महिला विश्वकप अन्तर्गत अर्जेन्टिना र दक्षिण अफ्रिकाले बराबरी खेलेका छन् ।

नेपाली समयानुसार शुक्रबार बिहान सम्पन्न खेलमा दुबै टिमले २–२ गोलको बराबरी खेल्दै अंक बाँडेका हुन् । दुई गोलले पछि परेको अवस्थामा अर्जेन्टिनाले बराबरी गरेको हो ।

न्यूजिल्याण्डको फोर्सिथ वार स्टेडियममा भएको खेलको ३० औं मिनेटमा लिन्डा मोथालोले गोल गर्दै दक्षिण अफ्रिकालाई सुरुवाती अग्रता दिलाएकी थिइन् । ६६ औं मिनेटमा थेम्बी क्गट्लानाले गोल गर्दै अफ्रिकाको अग्रता दोब्बर पारिन् ।

तर, ७४ औं मिनेटमा सोफिया ब्राउन र ७९ औं मिनेटमा रोमिना नुनेजले गोल गर्दै अर्जेन्टिनालाई २–२ को बराबरीमा ल्याए । त्यसपछि खेलमा थप गोल हुन सकेन र दुबै टिमले अंक बाँडे ।

समूह जी मा रहेका दक्षिण अफ्रिका र अर्जेन्टिना २ खेलबाट १ अंक जोड्दै क्रमशः तेस्रो र चौंथो स्थानमा छन् ।