मेसी आवद्ध मियामीले जित्यो लिग्स कपको उपाधि

एजेन्सी । लिग्स कपको उपाधि इन्टर मियामीले जितेको छ । भर्खरै सम्पन्न फाइनल खेलमा नासभिल्लेलाई पेनाल्टीमा हराउँदै मियामी च्याम्पियन बनेको हो । निर्धारित ९० मिनेटसम्म दुवै टोलीले एक–एक गोलको बराबरी खेलेपछि खेल टाइब्रेकरमा गएको थियो ।

जसमा मियामी १०–९ ले विजयी बन्यो । खेलको २३ औं मिनेटमा लियोनल मेसीले गोल गर्दै मियामीलाई सुरुवाती अग्रता दिलाएका थिए ।

यता, ५७ औं मिनेटमा फाफा पिकल्टले गोल गर्दै नासभिल्लेलाई १–१ गोलको बराबरीमा ल्याए । त्यसपछि दुवै टोलीले केही गोल गर्ने अवसर पाएपनि गोल गर्न भने सफल भएनन् ।

यसै सिजन मियामी आएका मेसीको यो यस क्लबबाट पहिलो उपाधि रहेको छ । उनी सातवटै खेलमा गोल गर्न सफल समेत भए ।

अमेरिकी र क्यानडाका टोलीले खेल्ने मेजर लिग सकर र मेक्सिकोको लिगा एमएक्सको ४७ टोली यस प्रतियोगितामा प्रतिस्पर्धा गरेका थिए ।